ജൈവവൈവിദ്ധ്യം

കേരളത്തില്‍ 6 ദേശീയ ഉദ്യാനങ്ങളും, 18 വന്യജീവി സങ്കേതങ്ങളും ആണ് ഉള്ളത്. ലോകത്തിലെ എട്ട് ജൈവവൈവിധ്യ ഹോട്ട്സ്പോട്ടുകളിൽ ഒന്നായി കണക്കാക്കപ്പെടുന്ന പശ്ചിമഘട്ടം, ഏഷ്യൻ ആന, സിംഹവാലൻ കുരങ്ങ്, വരയാട് എന്നിവയുൾപ്പെടെയുള്ള ജീവജാലങ്ങളുടെ നിർണായക ആവാസവ്യവസ്ഥയാണ്.

പാരിസ്ഥിതികമായി വളരെ അധികം പ്രാധാന്യം ഉണ്ടായിരുന്നിട്ടും, കേരളത്തിന്റെ ജൈവവൈവിധ്യം സംരക്ഷിക്കുന്നതിനും നിലനിര്‍ത്തുന്നതിനുമുള്ള ശ്രമങ്ങള്‍ വളരെ അധികം പ്രതിസന്ധികളും വെല്ലുവിളികളും നിറഞ്ഞതാണ്. കൃഷിക്കായുള്ള മരം മുറിക്കൽ, അടിസ്ഥാന സൗകര്യവികസനം എന്നിവയ്ക്കായി മുന്‍കാലങ്ങളിലും മറ്റും ഉണ്ടായ വനനശീകരണം കേരളത്തിന്റെ സൂക്ഷ്മമായ ജൈവവൈവിധ്യസന്തുലിതാവസ്ഥയ്ക്ക് ഭീഷണിയാണ്.

കേരളത്തിലെ സസ്യ-ജൈവവൈവിദ്ധ്യത്തിന്റെ ചരിത്രരേഖയാണ് H.A വാൻറീഡ് തയ്യാറാക്കിയ “ഹോർത്തൂസ് മലബാറിക്കസ്” എന്ന കൃതി. കേരളത്തിന്റെ ജൈവവൈവിധ്യം അതിന്റെ സാംസ്കാരിക സ്വത്വവുമായി ആഴത്തിൽ ഇഴചേർന്നിരിക്കുന്നുവെന്ന് ഈ ഗ്രന്ഥത്തിൽ നിന്ന് മനസിലാക്കാം. “ഹോർത്തൂസ് മലബാറിക്കസിൽ” രേഖപ്പെടുത്തിയിരിക്കുന്ന വൈവിധ്യമാർന്ന സസ്യജാലങ്ങൾ മനുഷ്യരും പരിസ്ഥിതിയും തമ്മിലുള്ള ചരിത്രപരമായ ബന്ധത്തെ പ്രതിഫലിപ്പിക്കുന്നതാണ്. പാരമ്പര്യവൈദ്യശാസ്ത്രം, കൃഷി, ആചാരങ്ങൾ എന്നിവയുമായി ബന്ധപ്പെട്ട തനതായ രീതികൾ ജൈവവൈവിധ്യ സമ്പന്നതയിൽ വേരൂന്നിയവയാണ്.

ജൈവവൈവിധ്യ സംരക്ഷണത്തോടുള്ള കേരളത്തിന്റെ പ്രതിബദ്ധത കേവലം സർക്കാരുകളുടെ മാത്രമല്ല, മറിച്ച് സമൂഹത്തിന്റെ കൂട്ടുത്തരവാദിത്തം കൂടിയാണ്.