പരിസ്ഥിതി പുനഃസ്ഥാപനം

ഏകവിള തോട്ടങ്ങൾ നീക്കം ചെയ്യൽ: തദ്ദേശീയമല്ലാത്ത ഏകവിളതോട്ടങ്ങള്‍  കാലക്രമേണ സ്വാഭാവിക ആവാസവ്യവസ്ഥയെ തകർക്കുന്നു എന്നാണു വിലയിരുത്തപ്പെടുന്നത്. കേരളത്തിലെ തദ്ദേശീയ ഇനങ്ങളെ കൂടുതലായി പ്രോത്സാഹിപ്പിക്കുന്നതിനും ജൈവവൈവിധ്യം സംരക്ഷിക്കുന്നതിനും ആവാസവ്യവസ്ഥയുടെ ആരോഗ്യം മെച്ചപ്പെടുത്തുന്നതിനും ഏകവിള തോട്ടങ്ങൾ ക്രമേണ കുറച്ചു കൊണ്ട് വരുന്നതിന് ഈ നയം മുൻഗണന നൽകുന്നു.

തദ്ദേശീയ ജീവജാലങ്ങളുടെ സംരക്ഷണം: തദ്ദേശീയ സസ്യജന്തുജാലങ്ങളുടെ സംരക്ഷണത്തിനും അവയുടെ പുനഃസ്ഥാപനത്തിനും നയം മുൻഗണന നൽകുന്നു. ഇതിലൂടെ കേരളത്തിലെ ഭൂപ്രകൃതിയുടെ  പാരിസ്ഥിതിക സന്തുലിതാവസ്ഥ ഉറപ്പാക്കുകയും ജൈവവൈവിധ്യം സംരക്ഷിക്കുകയും ചെയ്യാന്‍ കഴിയുമെന്നാണ് കണക്കാക്കുന്നത്.

നൂതന സാങ്കേതിക വിദ്യയുടെ വിന്യാസം: വനപരിപാലനത്തിനായി നൂതന സാങ്കേതിക വിദ്യയുടെ ഉപയോഗത്തിന് നയം ഊന്നൽ നൽകുന്നു. വനസംരക്ഷണ പ്രവര്‍ത്തനങ്ങളില്‍ കാര്യക്ഷമതയും ഫലപ്രാപ്തിയും വർദ്ധിപ്പിക്കുന്നതിനും ദീർഘകാല സുസ്ഥിരത ഉറപ്പാക്കുന്നതിനും വേണ്ടി നൂതന സാങ്കേതിക വിദ്യകള്‍ നടപ്പിലാക്കുന്നതിനെയും ഈ നയം പ്രോത്സാഹിപ്പിക്കുന്നു.

ചെറുവനങ്ങൾ സൃഷ്ടിക്കൽ: സംസ്ഥാനത്തുടനീളം ചെറുവനങ്ങൾ വച്ച് പിടിപ്പിക്കുന്നത് വൃക്ഷാവരണം വർദ്ധിപ്പിക്കുന്നതിനും പാരിസ്ഥിതിക സന്തുലിതാവസ്ഥ ഉറപ്പ് വരുത്തുന്നതിനും സഹായിക്കും എന്നതിനാല്‍ ഇത്തരം പ്രവര്‍ത്തികള്‍ക്കും 2021-ലെ ഇക്കോ റെസ്റ്റോറേഷൻ പോളിസി പ്രാധാന്യം നല്‍കുന്നു. നഗരങ്ങൾ ഉൾപ്പെടെ വിവിധ പ്രദേശങ്ങളിൽ ഇത്തരം  ചെറുവനങ്ങൾ സ്ഥാപിക്കുന്നതിലൂടെ പാരിസ്ഥിതിക സുരക്ഷ ഉറപ്പു വരുത്തുവാനുള്ള ശ്രമങ്ങള്‍ക്ക് കാര്യമായ പുരോഗതി ഉണ്ടാകും.

കേരളം മുന്നോട്ടു വെച്ച മികച്ച ആശയം എന്ന നിലയിൽ   ‘ഇക്കോറെസ്റ്ററേഷൻ പോളിസി 2021’ ഏറെ പ്രശംസിക്കപ്പെടുന്നുണ്ട്. കേരളത്തിന്റെ പാരിസ്ഥിതിക പുനരുദ്ധാരണത്തിനുള്ള സമഗ്രമായ മാർഗരേഖയായാണ് ഇതിനെ കാണുന്നത്. കേവലം പുനഃസ്ഥാപനത്തിനപ്പുറം, വനവിഭവങ്ങളെ ആശ്രയിക്കുന്ന സമൂഹങ്ങളുടെ ഉപജീവന അവസരങ്ങൾ പ്രോത്സാഹിപ്പിക്കുന്നതിനും പൊതുജനപങ്കാളിത്തത്തിനും നയം ഊന്നൽ നൽകുന്നു. ഒപ്പം തന്നെ മനുഷ്യ-വന്യജീവി സംഘർഷങ്ങൾ പരിഹരിക്കാനും  പ്രകൃതിദുരന്തങ്ങളുടെ ആഘാതം ലഘൂകരിക്കാനും എല്ലാവർക്കും സുസ്ഥിരമായ വികസനം ഉറപ്പാക്കാനും ഈ സമഗ്ര സമീപനം ലക്ഷ്യമിടുന്നു.